Pak net para finales së “The Voice Kids” në Top Channel, në skenë u ngjit Ylli Limani për të performuar disa nga këngët e tij të fundit. Pas interpretimit, ai i përshëndeti të gjithë konkurrentët, por edhe jurinë e këtij edicioni, megjithëse të gjithë e dinin se përshëndetja më e ngrohtë shkonte në drejtim të Miriamit – me të cilën ai ka një ‘inat’ të vjetër që nga edicioni i parë.
Ishte fare rastësor momenti kur Ylli Limani mori pjesë në audicionet e “The Voice”, në vitin 2011. Sapo kishte mbaruar mësimin dhe, ndryshe nga të gjitha herët e tjera, atë ditë kishte vendosur ta bënte rrugën për në shtëpi me këmbë. Dhe meqë i ra rruga, vendosi ta shkonte të provonte një herë të këndonte (ishte dita e fundit e audicioneve)…
Dhe kaq ishte. Ylli e kaloi fazën e parë me dy karrige të kthyera. Në fakt, nuk ishte asnjëra nga ato që do donte. Veten e gjente më shumë te Alma, por sidomos te Miriami për stilin e veçantë, por nuk ishte e thënë.
Kështu i ndodhi Ylli Limanit në edicionin e parë të “The Voice”, pa pjesëmarrjen e të cilit ai nuk do të ishte bërë këngëtar. Ky talent show shërbeu si trampolinë për të ardhmen e tij në muzikë, ndaj nëse nuk do të merrte pjesë, me siguri, nuk do të ishte bërë këngëtar.
Këngëtari rrëfeu pasditen e sotme në “Pasdite në Top Channel”, historinë dhe eksperiencën e parë në talent show-n "The Voice of Albania", nga i cili nuk la pa përmenduar edhe pengun për Miriam Canin. Siç tha ai, do të donte më shumë që të ishte ajo e kthyera: “Po desha të kthehej Miriami, për shkak të stilit dhe butësisë artistike, por ajo nuk u kthye”, – tha ai.
Pas Miriamit, edhe Alma mund të kishte qenë e zgjedhura e Yllit, por as ajo nuk u kthye. Eltoni dhe Sidriti ishin ata që u bindën nga zëri i Yllit, ndërsa zgjedhja e Yllit ishte krejt e kundërt me atë që ai kishte menduar të bënte qysh në fillim: “Nëse do të ishin kthyer të katërt, kurrsesi nuk do ta kisha zgjedhur Eltonin. Më dukej gati i frikshëm, shumë i rreptë, por ishte krejt e kundërta”, – tha Ylli.
Pavarësisht zgjedhjes me apo pa dashje, rrugëtimi i Yllit në “The Voice” nuk ishte rastësor. Dhe këtë e ka treguar mjaft mirë suksesi me këngët dhe hitet e tij të njëpasnjëshme.
