Sipas “The Sunday Times” u publikua lista e muzikantëve më të pasur në Britani për vitin 2018, të ndarë në dy kategori; më të pasurit në vend dhe më të pasurit nën 30 vjeç.
Pasuria e Ed Sheeran është rritur më shumë se çdo muzikant tjetër në Britani gjatë vitit të fundit, nga 28 në 80 milionë paund. Viti 2017 ishte shumë i suksesshëm për Ed Sheeran.
Harry Styles renditet i treti në listën e të rinjve më të pasur, me 50 milionë paund. Kënga e tij debutuese si solist “Sign of the Times” dhe albumi i titulluar me emrin e tij ishte numri një në Britani për vitin 2017. Ish-shoku i grupit “One Direction” Niall Horan ka pasur gjithashtu një rritje të shpejtë të fitimeve, nga 6 në 46 milionë paund. Pjesë e kësaj liste janë Adele (140 milionë paund), Ed Sheeran (80 milionë), Jessie J (18 milionë ) dhe Rita Ora (16 milionë).
Sir Paul McCartney kryeson listën e artistëve britanikë për një tjetër vit. Pasuria e tij me gjithë atë të bashkëshortes Nancy Shevell, duke u vlerësuar në 820 milionë paund. Paul bëhet kështu muzikanti më i pasur në historinë e “Rich List”, që kur është publikuar në vitin 1989. Sir Paul dhe Sir Elton John janë të vetmit emra të pranishëm ende që ishin edhe në edicionin e parë, 29 vjet më parë.
